சாலையில் ஒரு ஜோடி

சாலையில் ஒரு ஜோடி

காலையில் எழுந்து,
வீட்டின் கருமங்களை
கருத்தாய் முடித்து
பணிக்கு செல்கையில்
சாலையில் ஓர் காட்சி !

சிறிதும் பெரிதுமாய்
சாரை சாரையாய் வண்டிகள் !
சமத்துவ சின்னமாய்
சாலை முழுவதும்
பல்வேறு மனிதர்கள் !
மத்தியில் கண்டேன்
சாலையில் ஒரு ஜோடி!

உலர்ந்த உடல்
தளர்ந்த தேகம்
ஊண் தேடி தவிக்கும் விழிகள்
தானம் தேடி ஏந்திய கைகள்
தள்ளாடும் கால்கள்

சாலையோர கல் ஒன்று
சிறிதே தடுக்க
தள்ளாடுகிறார் அவர் !
உடன் தாங்கி கை பிடித்து
அவர் கை வாங்கி
தன் தோளில் வைக்கிறார் துணைவி!

இடையில் ஒருவன்,
காலத்தை வெல்லும்
திட்டம் தீட்டி,
வேகத்தை விவேகம் என்றெண்ணி
நடைபாதையில் ஊர்தியை விட,
துணைவியை அனைத்து
தூர இழுக்கிறார் அவர் !

ஏனோ இவர்கள் சாலையில் இன்று
என்றும் அறியேன் நான்!
இந்த அன்பு என்றும் நிலைக்கும்
என்று அறிவேன் நான்!